Weck aüff behendt, Den ort zw gesicht wendt, Wer mit schritten wol becket, Vil hew er ser strecket. So nw der meyster daß erst stuck auß gelegt hat und erczelt mit seyner eygenschafft nw hebt er an 

daß ander stuck und spricht weck auff wehendt etc Nw merck daß der wecker ist der vyer verseczen eyneß wyder dy vyer leger wann do mit gewynt man den stiren und den eber und dy unterhew etc. Item den wecker mach alzo wenn dw mit dem zw vechten zw dem man kumbst stet er den gegen dir und hellt seyn messser fuer den kopff yn der hut deß stiren auff seyner lincken seytten So secz den lincken fueß fuer und hab deyn messer auff deyner rechten achseln oder yn der schranckhut pey deynem rechten payn und spring mit dem rechten fues wol auff deyn rechte seytten und schlag yn mit der rechten schneyden wol auff seyn messer yndeß wendt ym den ortt in daß gesicht etc.

Weck uff behend, den Ortt zu gesicht wind,  wer mit schritten wol wecket, vil haubt er sere strecket, Hie saget der meister von eiynem haupt stuck und von eynen hauw und ist gemelt der wecker hauw der anders.
Item den wecker treibe also wan du mit dem zu fechten, zu dem man kümpst steht er im dan gegen dir und hebt das messer vor den kopff in der hut des stiers uf seiner lincken Seite. So setz deinen lincken fuß fur und heb dein messer auff diner rechten achsell oder in der schrankhutt by dinen rechten beyn und spring mit deinen rechten fuß wol rauß uff deine rechten seiten und schlag zu mit der rechten schnide wol uff sin messer Indeß winde ihm den ortt in daß gesichtt.